Mikabat sa dos milyones ka pesos, kapin kon kulang, ang gipagawas na usab sa rehiyonal nga buhatan sa DSWD kun Department of Social Welfare and Development alang sa 14 ka mga hugpong sa Pantawid Pamilya gikan sa 14 usab ka mga barangay sa upat ka lungsod sa probinsya.

Ang maong kantidad gipagawas pinaagi sa probinsyal nga buhatan sa DSWD sa Mis. Occ. isip tabang pinansisyal ubos sa kun Self Employment Assistance Tungo sa Kaunlaran Livelihood Program ngadto lamang gayud sa mga nga kabus nga pamilya nga nahitala subay sa statistika sa NHTS kun National Household Targeting System.

Ang mga barangay nga nahatagan niini naglakip niining mosunod: Biasong, Katipa, Eastern Poblacion ug Western Poblacion sa lungsod sa Lopez Jaena.
Ingon man usa sa Bagumbang, Calolot, Digson, Kanaw-Kanaw, Lumapas ug Poblacion sa lungsod sa Bonifacio, Sibulin, Looc Proper ug Puntod sa lungsod sa Plaridel; ug Sinuza sa lungsod sa Tudela.

Nasayran, nga ang buhatan sa DSWD-Mis. Occ. uban sa probinsyal nga pangagamhanan ni Governor Herminia M. Ramiro ug sa mga local executives sa matag lungsod ang naningkamot gayod karon sa pagtabang sa mga kabus nga mga Misamisnon nga mahaw-as sa tumang kalisod pinaagi sa paghatag kanila sa mga programang makatabang sa pagsulbad niini sama sa mga programa sa national nga buhatan sa DSWD nga Pantawid Pamilya, SEA-K ug KALAHI-CIDSS Program, ug uban pa.

Subay niini naglaum ang mga nagdumala sa maong mga programa nga matabangan o mas mapadali ang paghaw-as sa mga kaigsuonang misamisnon gikan sa kalisud.

Apan gikinahanglan usab ang hugtanon nga suporta sa mga beneficiaries sa programa sa pagtuman sa kon unsa man ang mga anaa sa kasabotan tali sa maong mga programa aron kini mamahimong malambo-on ug magmalampuson ang tumong ug tinguha niini. (PN-PIA-10 Mis. Occ.)