Si Bai Zorahayda, DSWD 12 regional director, nagsiling nga sa subong ila ginaplastar ang mga puwede nga buluhaton sa pangabuhian nga maghatag sang oportunidad nga may ara kinitaan ang mga 148,000 ka mga pinakaimol nga pamilya sa rehiyon nga nakaagum sang kaayuhan halin sa kaugalingon nga giho, nga ginahinganlan man nga Pantawid Pamilyang Pilipino Program o kon 4P’s.

Siling pa niya nga ang ini nga tikang ang nagapanguna nga tuyo para ang mga manogbaton sang kaayuhan sa 4P’s sa rehiyon mangin produktibo kag magsalig sa kaugalingon kon mauntat na ang ila ginabaton nga kuwarta sa tatlo ka tuig nga hilikuton.

Hambal pa ni Taha nga kinahanglan idugang nila ang mga hilikuton nga parti sa pangabuhian tungod sa pagpangusisa sang nagligad nga tuig nagapakita nga mga 70 porsiyento sang nagabaton sang kaayuhan sa una nga duha ka hamtang ara pa lang sa paghulag nga pagpanikasug bisan nakaagum na sang bulig nga kuwarta.

Sa 2011 nga report sang DSWD 12, si Taha nagsiling nga sa mga 17,189 ka pamilya nga nasakup sang ila social welfare indicator (SWI) nga survey sang nagligad nga tuig 12,508 o kon 68.48 ka porsiyento sa ila ara lang gihapon sa una nga kahamtang sang pagpanikasug.

Hambal pa niya nga yadtong panimalay nga ini amo ang puntirya sang “case management” nga hilikuton nga himoon sa mga nagasulugpon nga banwa para sa posible nga pagpamalabag nga mahimo para buligan nga mag-ayo ang ila pangabuhi.

Dugang pa niya nga ang mga duog nga nasakop sang survey ginakabig nga “pilot areas” sa rehiyon para sa tatlo ka tinutuyo nga gintipon nga pamaagi kontra kaimolon, nga upod man ang Kapit-Bisig Laban sa Kahirapan – Comprehensive Integrated Delivery of Social Services (KALAHI-CIDSS) kag ang Self-Employment Assistance – Kaunlaran (SEA-K). (EBdelaCruz/PIA12)