Tagalog news: Pagdiriwang ng Buwan ng Wikang Pambansa sa Mis. Occ. naka pukos sa Wikang Filipino

ugnayan

navigate

select

Philippine Information Agency

PIA Bldg, Visayas Ave, Diliman,

Metro Manila, Philippines

Official website: http://www.pia.gov.ph/

connect now

Cancel

Tagalog news: Pagdiriwang ng Buwan ng Wikang Pambansa sa Mis. Occ. naka pukos sa Wikang Filipino

OROQUIETA CITY, Misamis Occidental ·

By Rutchie Cabahug-Aguhob

posted 18-Aug-2012 ·

0 comments

Ipinagdiriwang ng Misamis Occidental Schools Division (MOSD) ang Buwan ng Wikang Pambansa, mula Agosto 1-31, sa taong kasalukuyan na naka pukos sa “Tatag ng Wikang Filipino, Lakas ng Pagka Pilipino.”

Ito’y alinsunod sa itinakda ng Proklamasyon Bilang 1041, serye ng taong 1997 na nagpapahayag ng taunang Buwan ng Wikang Pambansa, tuwing buwan ng Agosto, na pinangugunahan ng Komisyon ng Wikang Filipino (KWF) sabi ni Jonathan Dela Peňa, Superintendente ng MOSD.

Sabi ni Dela Peňa ang pagdiriwang ay naglalayon na maisakatupran ang mga tungkulin ng KWF, ayon sa itinakda ng Seksiyon XIV, Letrang L ng Batas Republika 7104, at mapalakas lalo ang wikang Filipino bilang wikang pambansa at wikang panlahat para sa lakas at tatag ng sambayanang Pilipino.

Layunin din nito na magunita ang kasaysayan ng wikang pambansa sa ika-75 na taon mula ng ipahayag ang Tagalog bilang batayang wika, maganyak ang mamamayang Pilipino na makilahok sa Timpalak ng Pagsusulat sa Sanaysay sa Filipino at lalong pasiglahin ang mga paaralan sa pakiisa sa pagdiriwang ng Buwan ng Wikang Pambansa.

Sabi din ni Dela Peňa, kalakip nito ang mungkahing palatuntunan ng mga gawain sa isang buwang pagdiriwang na hinati sa limang (5) paksa:

Agosto 1-7, Pitumpu’t limang taon (75) sa Pagsusulong ng Wikang Filipino sa Edukasyong Pilipino. Kalakip nito ang pagtalakay ng mga sumunod:

Pagbabalik-tanaw sa kasaysayan ng wika, pagdaraos ng talakayan hinggil sa isyu ng pagpapaunlad ng wikang Filipino, at pagsasagawa ng mga eksibit na ang tema ay nauukol sa kasaysayan ng wikang Filipino mula ng ipahayag ang Tagalog bilang batayan ng pambansang wika.

Paggagamit ng wikang Filipino sa mga komunikasyon at korespondensiyang opisyal at iba pang disiplina at pagtalakay na ang wikang Filipino ang pangunahing daluyan ng pagsasalita, pagbasa at pagsulat.

Agosto 8-14, Filipino at iba pang Wika sa Pilipinas: Lakas ng K to 12 at MTB-MLE. Kalakip nito ang pagtalakay ng wikang Filipino at iba pang mga wika bilang wika sa binagong kurikulum sa edukasyon sa Mother-Tongue Based-Multi Lingual Education (MTB-MLE) at pagpalakas sa pagturo alinsunod sa kurikulum ng K plus 12.

Pagdaraos ng mga debate sa paksang “Nakakatulong ang Wikang Katutubo sa Pagpapa-unlad ng Wikang Filipino,” pagpapasulat ng maiksing sanaysay kaugnay ng pagdiriwang ng wikang pambansa sa antas elemetarya at sekondarya, at paghahanda na may kaugnayan sa paksa, para sa lalo pang pagpapasigla ng pagdiriwang.

Agosto 15-21, Wikang Filipino at iba pang wika sa rehiyon: Wika ng Bayan sa kapayapaan. Kalakip nito ang pagsasapuso ng pag-awit ng “Lupang Hinirang,” pagsasapuso ng Panatang Makabayan at pagsasapuso ng awiting bayan bilang bahagi ng programa sa pagdiriwang.

Pagtataguyod ng mga komperensiya na ang pukos ay ang pagpapalutang ng pagkakakilanlan ng pagka Pilipino at paggawa ng poster para sa kabansaan, na nagsusulong ng isang wikang matibay na nagbibigkis ng bayang maunlad.

Agosto 22-28, Wikang Filipino, Wikang Panlahat para sa Matatag na Lipunang Pilipino. Kalakip nito ang pagtatanghal ng masining dula-dulaan, tula at talumpatian para sa pagpapatatag ng edukasyon at kultura at nagpahalaga sa sariling pag-iisip, dangal at marangal na adhikain bilang malayang bansa.

Pagpapalakas ng paggagamit ng wikang Filipino sa pagtuturo, paggagamit sa wikang Filipino sa mga talakayan sa loob at labas ng silid-aralan, pagbuo ng programa na magpapakita ng matatag na lipunan, at pagtatanghal ng programa sa kabuuan ay para sa kapakanang pang-edukasyon at pangkultura.

Agosto 29-31, Wika ay Kakambal ng Kapayapaan sa Pagtahak sa Tuwid na Landas. Kalakip nito ang pagtataguyod ng pampaaralang timpalak sa pag-aayos ng mga silid-aralan na magtatanghal ng isang buwang pagpapahalaga ng wikang pambansa.

Pagtatanghal ng masining na timpalak sa pagbigkas na ang paksa ay ang paggamit ng wika sa pagtahak sa tuwid na landas at pagdara-os ng palatuntunan na nagtatanghal ng wika bilang kakambal ng kapayapaan sa pagtahak ng tuwid na landas. (PIA-Misamis Occidental)

comments

What do you think?

0 comments

New to ugnayan?